காலக் குருதி

காலமோ நிற்காமல் கணம்கணமும் தொடர்ந்து
ஓடிக்கொண் டிருக்கும் உயிர்க்குருதி!
எப்படித்தான்
குருதி உடலுள் சுழன்றோட
உயிர்துடித்து
இருக்குமோ…அப்படி இக்காலக் குருதி ஓட…
‘இயற்கை – உடல்’ கணமும்
இயங்கிக்கொண் டிருக்கிறது!
இயற்கைக்கு இடையறாது
உயிரூட்டல் மட்டுமன்றி
குருதிக்கும் காலத் தினுக்கும்
பல்வேறு
பொருத்தங்களும் உளது!
இயற்கையின் அங்கங்கள்
தரை,கடல், காற்று, மலை, தாவரம், விலங்கு,
அனைத்தையும் போஷித்து,
அவற்றினது மூச்சிற்குக்
கணந்தோறும் காற்றடித்து,
கனற்சக்தி பிறக்கவைத்து,
தினம் இயற்கை தனிலிருந்து
சேரும் கழிவுகளைப்
பரிகரித்து,
இயற்கையில் கிருமி தொற்றாது தடுக்க
சிறந்த ‘நிர்ப்பீடன’
பொறிமுறைபோற் பாதுகாத்து,
சக்தி கொடுத்து,
சத்துகளும் அளித்து,
அத்தனை வளர்ச்சிக்கும்
அளவளவாய் ஓமோன்கள்
நொதியஞ் சுரந்து,
நோய் நொடியில் சாயாமல்
உதவி புரிந்து,
ஓயாமல் காயாமல்
இயற்கை செழிக்கவைத்து,
உயிரோட்டம் மாறாமல்
இடையறாது ஓடி…
எழில் மினுக்கம் ஊட்டி,
தடைகளற்று இயற்கையங்கம் தழைக்கத் துணைசெய்யும்
காலக் குருதி;
அது ஓடும் இன்னுமின்னும்
கோடிகோடி ஆண்டு;
இயற்கை கொழிக்கும் உயிர்பெருகி!